წინასწარი ინფორმაციით, ხუთი ადამიანი დაიღუპა და რამდენიმე დაიჭრა აშშ-ში, ლოს-ანჟელესის ერთერთ გარეუბანში სროლის შედეგად, რომელიც 20 წლის ახალგაზრდა მამაკაცმა წამოიწყო.
ამის შესახებ CNN იუწყება.
სანტა-მონიკას საუნივერსიტეტო დასახლებაში შავ ჯავშანჟილეტში ჩაცმულმა ახალგაზრდამ თავდაპირველად ორი ადამიანი სახლში მოკლა, შემდეგ კი ქუჩაში გამოვიდა და კოლეჯისკენ გაემართა, გზაში კი კიდევ ორი ქალი გამოასალმა სიცოცხლეს. თავდამსხმელი შაშხანით იყო შეიარაღებული.
თვითმხილველები ამბობენ, რომ ახალგაზრდა მანქანების მიმართულებით ისროდა და განსაკუთებული მონდომებით იღებდა მიზანში ისეთ მანქანებს, რომელთაც ქალები მართავდნენ. პოლიციის ინფორმაციით, თავდამსხმელი კოლეჯთან მიახლოების შემდეგ ბიბლიოთეკაში შევიდა და უმისამართო სროლა ატეხა, თუმცა, არავინ დაზარალებულა.
სამართალდამცველები აცხადებენ, რომ ამის შემდეგ პოლიცია შევიდა ბიბლიოთეკაში და თავდამსხმელთან ორმხრივ სროლაში ჩაება, რა დროსაც მისი ლიკვიდაცია მოხდა. ძალოვნები არ აკონკრეტებენ, კონკრეტულად სად მოხდა თავდამსხმელის ლიკვიდაცია. “როიტერის” გადაღებულ ფოტოზე ჩანს, რომ მისი ცხედარი ტროტუართან გდია.
ადგილობრივმა პოლიციამ უარყო მედიით გავრცელებული ინფორმაცია იმის შესახებ, რომ ამ ტრაგედიის დროს 7 ადამიანი დაიღუპა. ტრაგედიის ადგილი, სანტა მონიკას კოლეჟი რამდენიმე კვარტლითაა დაშორებული იმ ადგილიდან სადაც ბარაკ ობამამ საქველმოქმედო საღამო ჩაატარა, თუმცა, კავშირი ობამას ვიზიტსა და ზემოთმოყვანილ თავდასხმებს შორის დადგენილი არ არის.