2017-12-06 09:31

გამთენიისას კიევში, რადის შენობის წინ, კარვების ქალაქზე, სადაც მიხეილ სააკაშვილი იმყოფებოდა, მორიგი იერიში მიიტანა სპეცრაზმმა და ისევ უშედეგოდ.

გამოიყენეს რეზინის ტყვიები, დაშავდნენ დემონსტრანტები, თუმცა, მათ კარვების ქალაქის სიღრმეში შეღწევის საშუალება სპეცრაზმს არ მისცეს.

ამ წუთებში რადის წინ დამატებითი ბარიკადების აღმართვა დაიწყო. უკრაინის გენპროკურატურის მიერ მიხეილ სააკაშვილისთვის მიცემული ვადა, რათა ნებაყოფლობით გამოცხადდეს დაკითხვაზე, თბილისის დროით 11 საათზე იწურება.

„ჩვენ უნდა ვიყოთ მშვიდად, წყნარად. ხალხი მობილიზებულია, ახლა შეამოწმეს ხალხის მობილიზაცია, კიდევ მთელი კიევი მოვარდება რამდენიმე ათასი კაცი. ისინი ამოწმებენ ხალხს, ხალხი ამოწმებს თავის თავს. მაგრები არიან, მობილიზაციას აკეთებენ სწრაფად,“ - განაცხადა მიხეილ სააკაშვილმა, რომელიც მთელი ღამის განმავლობაში დემონსტრანტებთან ერთად იმყოფებოდა.

შეგახსენებთ, მიხეილ სააკაშვილი გუშინ, სახელმწიფო უშიშროების სპეცრაზმმა საკუთარ სახლში, კიევის ცენტრში დააკავა, თუმცა, იზოლატორში მისი გადაყვანა ვერ შეძლო: სააკაშვილის მხარდამჭერებმა მანქანას ალყა შემოარტყეს და მიხეილ სააკაშვილი გაათავისუფლეს. 

პარალელურად, გენერალურმა პროკურატურამ მიხეილ სააკაშვილს ბრალი წაუყენა ვიქტორ იანუკოვიჩის გარემოცვის ოლიგარქის დაფინანსებით სახელმწიფო გადატრიალების მოწყობის მცდელობაში და მას დაკითხვაზე გამოცხადებისკენ მოუწოდა.