საქართველოს მესამე პრეზიდენტი, ენმ-ს დამფუძნებელი მიხეილ სააკაშვილი კონგოში ქართველი მფრინავის სოსო ოსორაულის შესაძლო დაღუპვის შესახებ გავრცელებულ ინფორმაციას ეხმიანება და წერს, რომ თუ ეს ფაქტი დადასტურდა, პასუხისმგებლობა მთლიანად ბიძინა ივანიშვილს ეკისრება.
მიხეილ სააკაშვილი სომალელი მეკობრეების მიერ ექვსი ქართველი მეზღვაურის დაკავების ფაქტს იხსენებს, როცა სომალიში მივლინებულმა გივი კარბელაშვილმა ბულგარეთის სპეცსამსახურებისა და ადგილობრივი ძალების დახმარებით ექვსივე ტყვე უვნებლად გამოიხსნა.
შეგახსენებთ, სოსო ოსორაულის დაღუპვის ფაქტი "იმედის კვირას" ექსკლუზიურ ინტერვიუში კონგოელ ამბოხებულთა ლიდერმა დაუდასტურა, თუმცა, საგარეო საქმეთა სამინისტრო, იმის გამო, რომ ქართველი მფრინავის დაღუპვის დამადასტურებელი პირდაპირი მტკიცებულება არ არსებობს, აგრძელებს მისი ბედის გასარკვევად მუშაობას.
"როდესაც სომალელმა მეკობრეებმა ჩვენი ექვსი მეზღვაური დააკავეს, თბილისში შევქმენი შტაბი და სომალში ვაფრინე ჯგუფი გიორგი კარბელაშვილის ხელმძღვანელობით. გიორგიმ, თავის მხრივ, იქირავა სპეციალური დანიშნულების რაზმი ბულგარეთიდან და ადგილობრივი ძალოვნები და რამდენიმე კვირიანი მცდელობის შედეგად, ყველა ჩვენი მოქალაქე უვნებელი გამოვიხსენით, ასევე მათთან ერთად გავათავისუფლეთ რამდენიმე თურქი მძევალი.
გათავისუფლებულებს სტამბულის აეროპორტში წითელ ხალიჩაზე ერდოღანთან ერთად დავხვდი და მთელი თურქეთი მადლობას გვიხდიდა. ის, რაც ვერ შეძლეს მათ, გავაკეთეთ ჩვენ.
თუ მართალია ჩვენი მფრინავის კონგოში დაღუპვის ამბავი, პასუხისმგებლობა მთლიანად ეკისრება ივანიშვილს, რომელმაც ჯერ თითქმის ნულამდე შეამცირა საქართველოს საჰაერო ძალები და სიმწრით მომზადებულ მფრინავებს აიძულა ლუკმა პურის საშოვნად უცხოეთში წასვლა და შემდეგ განსაცდელში მიატოვა სოსო ოსორაული", - წერს მიხეილ სააკაშვილი "ფეისბუქზე".
