-
2015-11-01 02:19
"პატრიოტთა ალიანსის" ლიდერი ირმა ინაშვილი საგარეჯოს სააღცევნო ოლქში შუალედური არჩევნების შედეგების გაყალბებაზე საუბრობს. მისი თქმით, ბალანსი დარღვეულია ბიულეტენების რაოდენობასა და ამომრჩეველთა რაოდენობას შორის, ასევე, ხმების დაჯამებისას.
წარმოუდგენელია, რომ 12-ვე უბანში მე წავაგე. თანაც, დარღვეულია ბალანსი: ვთქვათ, მე მაქვს 20 ხმა და იმათ აქვთ 300... მარტო ერთ სოფელში ქორწილში 500 კაცი ტაშს მიკრავდა, 20 ხმა როგორ ავიღე იმ სოფელში?", - აცხადებს ირმა ინაშვილი "ობიექტივის" ეთერში.
ირმა ინაშვილი გულისხმობს ქორწილს, სადაც გადაღებული კადრები სოციალურ ქსელშიც გავრცელდა. ირმა ინაშვილი ქორწილშია გადაღებული, სადაც ის ცეკვავს. აღწერის მიხედვით, "პატრიოტთა ალიანსის" წარმომადგენელი იორმუღანლოში, ჰუსეინოვების ქორწილში იმყოფებოდა.
შეგახსენებთ, ცენტრალური საარჩევნო კომისიის წინასწარი მონაცემებით, 24 უბნის შედეგებით, პარლამენტის შუალედურ არჩევნებში საგარეჯოში ქართული ოცნების კანდიდატი თამარ ხიდაშელი ლიდერობს. მას 3067(47.78%) ხმა აქვს, ხოლო პატრიოტთა ალიანსიდან ირმა ინაშვილს კი 3033(47.25%). ამ დროისთვის დასათვლელი კიდევ 26 უბანია.