2014-02-07 19:53

„თავისუფლებისა და მხარდაჭერის ცენტრის“ დამფუძნებელმა, ყოფილი თავდაცვისა და შს მინისტრის ბაჩო ახალაიას მეუღლემ ანი ნადარეიშვილმა ატვირთა ვიდეო, სადაც ახალაიას ბრალდების მთავარი მოწმე გია გორგაძეა გადაღებული.

ვიდეო ოფისის ფოიეში, სავარაუდოდ, სათვალთავალო კამერიდანაა ამოღებული და ჩანს გორგაძე, რომელიც დაცვის წევრს ელაპარაკება.

შეგახსენებთ, რომ ბაჩო ახალაიას ადვოკატისა და ანი ნადარეიშვილის განცხადებით, გია გორგაძე, რომელიც ბრიფინგზე აპირებდა თქმას, როგორ აიძულებდა პროკურატურა, მიეცა ჩვენება ბაჩო ახალაიას წინააღმდეგ, „პრაიმტაიმის“ პრესკლუბში მიმავალი, ოფისთან დააკავეს. ამის ამსახველი კადრები „რუსთავი–2“–მაც გაავრცელა.

მოგვიანებით, უკვე კადრების გავრცელების შემდეგ პროკურატურამ დაადასტურა, რომ გორგაძე უწყებაშია და მოწმის სტატუსით მისი დაკითხვა მიმდინარეობს.

შეგახსენებთ, რომ გია გორგაძე ბაჩო ახალაიას საქმეში, ე.წ. წამების ეპიზოდის ბრალდების მთავარი მოწმეა. ის 2006 წელს ნავთლუღის ბაზართან სპეცოპერაციის დროს ლიკვიდირებული პირის ძმაა.