-
2014-02-02 22:57
ე.წ. სამხრეთ ოსეთისა და აფხაზეთის რესპუბლიკების წარმომადგენელი იტალიაში მაურო მურჯა ეხმიანება იტალიისა და საქართველოს საგარეო საქმეთა სამინისტროების რეაქციას ცხინვალისა და ლანუზეის დამეგობრების შესახებ.
შეგახსენებთ, იტალიაში, სარდინიის მხარეში მდებარე ქალაქ ლანუზეისა და ცხინვალს შორის დამეგობერბისა და თავისუფალი ეკონომიკური კავშირების დამყარების შესახებ ოფიციალური შეთანხმების არსებობა უარყო იტალიის საგარეო საქმეთა სამინისტრომ, საქართველოს საგარეო უწყებამ კი განაცხადა, რომ ამ საკითხში ყველაზე კომპეტენტურად სწორედ იტალიის საგარეო საქმეთა სამინისტროს პოზიცია მიაჩნია.
ამის მიუხედავად, ოსურმა მედისაშუალებებმა გაავრცელეს როგორც სარდინიაში ე.წ. სამხრეთ ოსეთის რესპუბლიკის წარმომადგენელთა ვიზიტის, ასევე გაფორმებული შეთანხმების ამსახველი ფოტომასალა.
2 თებერვალს ოსური მედია აქვეყნებს ტექსტს, რომელიც მაურო მურჯამ იტალიის მედიასაშუალებებს ბეჭდური ვერსიის სახით, გამოსაქვეყნებლად გაუგზავნა:
„უკვე რამდენიმე თვეა, იტალიაში საქართველოს დიპლომატიური წარმომადგენლობის პოზიცია ხასიათდება შოკისმომგვრელი სიჯიუტით. სწორედ სიჯიუტე უბიძგებს ისეთი ინიციატივის დაბლოკვისკენ, რომელსაც, თავის მხრივ, ხალხთა შორის მეგობრობა და მშვიდობის გამყარება აქვს მიზნად.
ხუთი წელი გავიდა იმ საშინელი აგვისტოს ღამის შემდეგ, როცა ქართული ჯარი თავს დაესხა ოს ხალხს, გაანადგურა და აწამა მშვიდობიანი მოსახლეობა. მაგრამ დღესაც საქართველოს ერთადერთ მიზანს წარმოადგენს აფხაზეთთან და სამხრეთ ოსეთთან თანამშრომლობისა და სოლიდარობის გამოვლინების ჩახშობა.
ქართველებმა უნდა შეიგნონ, რომ იტალია მათ კონტროლქვეშ მყოფი პროვინცია არ არის, ხოლო სარდინიას ავტონომიისა და დამოუკიდებლობის ისეთი ისტორია და ტრადიცია აქვს, რომ ვერ აიტანს მის საქმეებში ჩარევას.
სამხრეთ ოსეთთან მეგობრობის ასოციაცია ამტკიცებს, რომ შესაძლებელია არა ომისა და დაპირისპირების, არამედ სხვა გზით სიარული. სტალინი, ყველაზე „ცნობილი“ ქართველი, დიდი ხანია, გარდაიცვალა, წავიდნენ მისი მსგავსი მამულის დამცველებიც.
დოქტორი მაურო მურჯა, სამხრეთ ოსეთის რესპუბლიკისა და აფხაზეთის ოფიციალური წარმომადგენელი იტალიაში.“.
მაურო მურჯას წერილი „ოსინფომ“ დღეს გაავრცელა.