2014-12-19 11:08

ედგარ მამედოვი ცნობილი მარნეულელი ექიმბაშია. როგორც „იმედის“ გადაცემაში „სხვა რაკურსი გია ჯაჯანიძესთან ერთად“ გასულ სიუჟეტში ითქვა, მის სახლში, რომელიც თავის დროზე ზურაბ ჟვანიამ აუშენა, რიგები დღემდე არ წყდება.

სიუჟეტის მიხედვით, ედგარ მამედოვთან მკურნალობა მთლიანად უფასოა, ხოლო მადლიერ პაციენტებს შესაძლებლობა აქვთ, ეზოშივე მდგარ სპეციალურ შესაწირ ყუთში მათთვის მისაღები თანხა ჩააგდონ.

შესაწირის ნიმუშია ედგარ მამედოვის სახლიც. როგორც სიუჟეტის ავტორმა აღნიშნა, თავის დროზე ედგარ მამედოვმა ყოფილი, აწ გარდაცვლილი პრემიერის შვილი გადაარჩინა, რის შემდეგაც მადლიერმა ზურაბ ჟვანიამ სახლი აუშენა.

შეგახსენებთ, რომ ედგარ მამედოვს ზოგიერთი პაციენტი ემადლიერება, ზოგიერთი კი მას, უბრალოდ, სიმულანტად მიიჩნევს და აცხადებს, რომ ის ნებისმიერ დაავადებას მხოლოდ ერთი მეთოდით მკურნალობს - შემწვარი ფუტკრებისა და ბზუკებისგან დამზადებული გაუგებარი წარმომავლობის ე.წ. წამლებით.