"საქართველო რუსეთთან ურთიერთობის გაუმჯობესებისკენ ისწრაფვის", - ასე დაასათაურა "ევრონიუსმა" 14 მაისს გამოქვეყნებული ინტერვიუ საქართველოს პრემიერმინისტრ ბიძინა ივანიშვილთან.

საქართველოს შიდა პრობლემებთან და საგარეო კურსთან დაკავშირებული საკითხების გარდა, ბიძინა ივანიშვილს ჟურნალისტმა კითხვა დაუსვა საერთაშორისო მასშტაბის რამდენიმე კონფლიქტის დარეგულირებასთან დაკავშირებითაც.

ერთერთი შეკითხვა ასე ჟღერდა: "სერბეთმა და კოსოვომ განაცხადეს, რომ აწესრიგებენ ურთიერთობებს და დაიწყო მათ შორის შეთანხმების მომზადების პროცესი ბრიუსელში.

შესაძლოა ეს იყოს მაგალითი და მოტივაცია, რომ დაალაგოთ ურთიერთობა აფხაზეთთან და ოსეთთან?", რაზეც ბიძინა ივანიშვილმა უპასუხა:

"ეს ძალიან კარგი მაგალითია. ეს ადასტურებს, რომ მსოფლიო იცვლება და ადამიანები, ვინც წარსულში რაღაცას ვერ ახერხებდენ, ახლა პოულობენ საერთო ენას და აღწევენ შეთანხმებას. შესაბამისად, ჩვენ არ უნდა დავიშუროთ ენერგია, რომ დავლაგოთ ურთიერთობა ჩვენს ძმებთან - ოსებთან და აფხაზებთან და, რა თქმა უნდა რუსეთთანაც."

"ჩვენ აუცილებლად გავაკეთებთ ყველაფერს, რათა დავალაგოთ ურთიერთობა ჩვენს დიდ მეზობელთან", - ამბობს ივანიშვილი ინტერვიუში და დასძენს, რომ საქართველომ დაკარგა ტერიტორიის 20%, თუმცა აუცილებლად დაიბრუნებს მას, მხოლოდ არა ძალის გამოყენებით, არამედ მოლაპარაკების შედეგად. ივანიშვილი აცხადებს, რომ რუსეთსა და საქართვეელოს შორის დღეს არსებული ურთიერთობა არცერთი მხარისთვის არაა მისაღები და ხელსაყრელი.

პრემიერმინისტრი იმედს გამოთქვამს, რომ საერთაშორისო საზოგადოება დაეხმარება საქართველოს ტერიტორიული მთლიანობის აღდგენაში.

საქართველოს პრეზიდენტის ადმინისტრაცია მთავრობას ოკუპირებული რეგიონების აღიარების რისკის შესახებ აფრთხილებს, - ამის შესახებ პრეზიდენტის ადმინისტრაციის განცხადებაშია ნათქვამი. ადმინისტრაცია მთავრობას ფუნდამენტურ საკითხებთან დაკავშირებით პოლიტიკის კორექტირებას და 2008 წლის ომის გამოძიებაზე მუდმივი აპელირებისგან თავშეკავებას ურჩევს. "გვსურს, კიდევ ერთხელ მივმართოთ საქართველოს მთავრობას და გავაფრთხილოთ, რომ 2008 წლის ომის გამოძიებაზე მუდმივი აპელირება და საქართველოს მთავრობის დადანაშაულების მცდელობა განუზომლად ზრდის ოკუპირებული რეგიონების სხვადასხვა ქვეყნების მიერ აღიარების რისკს.ახალი ხელისუფლების ამგვარ დამოკიდებულებას შეიძლება მოჰყვეს კატასტროფული შედეგი ჩვენი ქვეყნისთვის, რაზეც პასუხისმგებლობა მთლიანად ამ გამოძიების ინიციატორებს დაეკისრებათ. საქართველოს ხელისუფლების დიპლომატიური ჩარევის შედეგად ოკუპანტმა სახელმწიფომ ჩვენი ტერიტორიების აღიარების საკითხთან დაკავშირებით მიზანს თითქმის ვერსად მიაღწია. სწორედ ამ დიპლომატიის შედეგია, რომ ყველა მნიშვნელოვანი საერთაშორისო ორგანიზაცია, ისევე როგორც მსოფლიოს სახელმწიფოები, ერთეული რეჟიმების გამოკლებით, აღიარებენ საქართველოს ტერიტორიულ მთლიანობას და რუსეთის მიერ საქართველოს განუყოფელი რეგიონების ოკუპაციის ფაქტს. ასევე, ყველა მნიშვნელოვან საერთაშორისო დოკუმენტში ასახულია ტერმინი "ოკუპაცია", რაც ქმნის იმის გარანტიას, რომ გარდაუვლად დადგება დეოკუპაციის დროც. ნებისმიერი ხელისუფლების ვალდებულებაა, მუდმივად იცავდეს საკუთარი ქვეყნის ინტერესებს, რაც თანმიმდევრულ პოლიტიკასა და მსოფლიოს ლიდერებთან აქტიურ ინტერაქციასაც გულისხმობს. სამწუხაროდ, ამჟამინდელი მთავრობის ზემოაღნიშნული პოზიცია 2008 წლის ომის გამოძიებასთან დაკავშირებით, არათანმიმდევრული დიპლომატია და განცხადებები, კოსოვოს მოდელის მისაღებობის შესახებ, დასახელებულ მიზნებს ვერ მოემსახურება", - აღნიშნულია განცხადებაში. პრეზიდენტის ადმინისტრაციის ინფორმაციით, მიხეილ სააკაშვილმა პრემიერ-მინისტრს რამდენიმე კვირის წინ სპეციალური წერილით მიმართა, რომელშიც არაღიარების პოლიტიკასთან დაკავშირებულ დეტალებს განუმარტავდა და მნიშვნელოვან საკითხებზე თანამშრომლობას სთავაზობდა. "სამწუხაროდ, ამ წერილს არავითარი რეაგირება არ მოჰყოლია. კიდევ ერთხელ მოვუწოდებთ პრემიერ-მინისტრსა და მთლიანად მთავრობას, კარგად დაფიქრდნენ მათი ქმედებების შესაძლო კატასტროფული შედეგების შესახებ და, საქართველოს სასიცოცხლო ინტერესებიდან გამომდინარე, მოახდინონ პოლიტიკის კორექტირება ფუნდამენტურ საკითხებთან დაკავშირებით. საქართველოს პრეზიდენტი კვლავაც გამოთქვამს მზადყოფნას, მჭიდროდ ითანამშრომლოს საქართველოს მთავრობასთან არაღიარების პოლიტიკისა და რუსეთის მიერ ოკუპირებული ტერიტორიების დეოკუპაციის, ისევე როგორც ქვეყნის უსაფრთხოებასა და განვითარებასთან დაკავშირებული ნებისმიერი მიმართულებით", - აღნიშნულია განცხადებაში, რომელიც პრეზიდენტის ადმინისტრაციის ოფიციალურ ვებგვერდზე გამოქვეყნდა.

ფარული ჩანაწერები საჯაროდ უნდა განადგურდეს,- ამის შესახებ იუსტიციის მინისტრმა თეა წულუკიანმა განაცხადა. ინიციატივა, რომელიც არასამთავრობო ორგანიზაციებმა გაახმიანეს, სპეციალური კომისიის შექმნასთან დაკავშირებით, აუცილებლად განსახორციელებელია. თუმცა აქაც არსებობს რისკები, ამიტომ ეს საკითხი კარგად უნდა იყოს შესწავლილი, - აცხადებს წულუკიანი. იუსტიციის მინისტრმა განაცხადა, რომ სექსუალური უმცირესობის ჩაგვრა ბარბაროსობაა. "ეს ადამიანები, გეები გამოდიან, რათა თქვან "გამარჯობა, ჩვენ ვარსებობთ," რადგან ისინი ხშირად ხდებიან ძალადობის მსხვეპლები, მათ შორის თავიანთი მშობლების მხრიდანაც. ერთ მშვენიერ დღეს ახალგაზრდა ბიჭი იღვიძებს და ხვდება, რომ მას ქალი კი არ მოსწონს, მოსწონს კაცი. ასეთი რაღაცები არსებობს, ეს ამ ადამიანების გამოგონილი არ არის. როდესაც ადამიანი იღვიძებს ასეთი განცდით და იმის გათვითცნობიერებით, რომ მე ვარ უმცირესობა. არ შეიძლება რომ ამის გამო მას ვინმე თავს დაესხას, გალახოს, რადგან ეს არის ბარბაროსობა. ეს არ არის ჩვენი ქართული საზოგადოების სახე, მე ამის მწამს,” - აღნიშნა წულუკიანმა.  მისივე თქმით, არ შეიძლება ცივილიზებული ადამიანები ერთმანეთს უჭვრიტინებდნენ, ვის ვისთან სძინავს.

პრეზიდენტის თანამდებობას ყველაზე მეტად ორი კანდიდატი - დავით ბაქრაძე და ირაკლი ალასანია შეესაბამება. ამის შესახებ ჟურნბალისტებთან თბილისის მერმა გიგი უგულავამ განაცხადა და აღნიშნა წინასწარ თქმა, თუ ვინ იქნება "ნაციონალური მოძრაობის" საპრეზიდენტო კანდიდატი შეუძლებელია.

"პრაიმერის შედეგი შესაძლოა, მოულოდნელი იყოს, როგორც ჩემთვის, ისე საზოგადოებისა და ჟურნალისტებისთვის. ჩემი აზრით, პრეზიდენტის თანამდებობას ყველაზე მეტად ორი კანდიდატი შეესაბამება - "ქართული ოცნების" მხრიდან - ირაკლი ალასანია, ხოლო "ნაციონალური მოძრაობიდან - დავით ბაქრაძე", - აღნიშნა გიგი უგულავამ.

გივი თარგამაძე საქართველოში ბრუნდება
და შიდა პოლიტიკაში აქტიურ მონაწილეობას
აპირებს. "მოამბესთან" ინტერვიუში თარგამაძე ამბობს,
რომ საქართველოში პირველივე რეისით დაბრუნდება.
იგი ბოლო რამდენიმე თვეა ლიტვაში ცხოვრობს.
თარგამაძემ ეს გადაწყვეტილება მას შემდეგ მიიღო,
რაც ინტერპოლის ბიურომ მასზე რუსეთის მოთხოვნით
დაწყებული ძებნა შეწყვიტა. ის ასევე განმარტავს, რომ
ინტერპოლმა ძალიან სწრაფად მოახდინა რეაგირება და
დაადგინა, რომ რუსეთის მიერ მიწოდებული საქმე არ
შეესაბამება ინტერპოლის კონსტიტუციას.

პოლიტიკური პარტიების ფინანსური მონიტორინგის
სამსახურის უფროსმა ნათია მოგელაძემ თანამდებობა
დატოვა. სახელმწიფო აუდიტის სამსახურში
განაცხადეს ,რომ ნათია მოგელაძემ გადაწყვეტილება
საკუთარი სურვილით მიიღო და თანამდებობა პირადი
განცხადების საფუძველზე დატოვა.

შეგახსენებთ, რომ პოლიტიკური პარტიების ფინანსური მონიტორინგის სამსახური 2012 წლის 4 იანვარს

შეიქმნა. შექმნის დღიდან მას ნათია მოგელაძე
ხელმძღვანელობდა.

კოალიცია "ქართული ოცნება" საპრეზიდენტო კანდიდატზე
11 ან 12 მაისს იმსჯლებეს, კანდიდატის ვინაობა კი,
სავარაუდოდ, 13 მაისს გახდება ცნობილი. ამის შესახებ
განცხადება საქართველოს საგარეო საქემთა მინისტრმა,
მაია ფანჯიკიძემ გააკეთა. როგორც ფანჯიკიძემ
განმარტა, "ქართულ ოცნებას" საპრეზიდენტო არჩევნებზე
ერთი კანდიდატი ეყოლება.
"ეს იქნება ძალიან ღირსეული კანდიდატი, რომელიც
დარწმუნებული ვარ, საზოგადოების დიდ მოწონებას
დაიმსახურებს", - აღნიშნა მაია ფანჯიკიძემ.
ამასთან, განცხადება, რომ კოალიციის პრეზიდენტობის
კანდიდატი მომავალი კვირის ორშაბათს გახდება ცნობილი,
პრემიერ-მინისტრმა, ბიძინა ივანიშვილმა გუშინ გააკეთა.
ამასთან, პარტიის პოლიტსაბჭო შეკრებას დღესაც გეგმავს.
არსებული ინფორმაციით, სხდომა კოალიციის ოფისში 12:00
საათისთვის დაიწყება.

შეიარაღებული ძალების დღესთან დაკავშირებით ყველა სამხედრო ბაზაზე საზეიმო მოწყობა გაიმართა. თავდაცვის მინისტრმა ირაკლი ალასანიამ პროფესიული დღესასწაული პირად შემადგენლობას თავდაცვის სამინისტროს სამწყობრო მოედანზე პირადად მიულოცა. "გილოცავთ საქართველოს შეიარაღებული ძალების 22-ე წლისთავს. ამ წლების განმავლობაში არაერთხელ დაამტკიცეთ, რომ თქვენ საკუთარი სიცოცხლის ფასად ღირსეულად ემსახურებით საქართველოს. სამშობლო, ღირსება, ერთგულება - ეს ჩვენი შეიარაღებული ძალების დევიზია, მიმართა ალასანიამ ჯარისკაცებს. დღესვე, საქართველოს შეიარაღებული ძალების ყველა სამხედრო ბაზაზე ტერიტორიული მთლიანობისთვის დაღუპულ სამხედროებს წუთიერი დუმილით პატივი მიაგეს. თავდაცვის მინისტრმა, გაერთიანებული შტაბის უფროსმა, პოლკოვნიკმა ირაკლი ძნელაძემ და მისმა მოადგილემ პოლკოვნიკმა ლაშა ბერიძემ

თეა წულუკიანი მოსამართლეებს მოუწოდებს, იუსტიციის საბჭოს წევრობის კანდიდატურები წარადგინონ და საარჩევნო კამპანია დაიწყონ. როგორც იუსტიციის მინისტრმა განაცხადა, მოსამართლეებს აქვთ კარგი შესაძლებლობა ერთი მხრივ მათი პროფესიული ცხოვრების განვითარებისთვის მნიშვნელოვანი ნაბიჯი გადადგან, ხოლო მეორე მხრივ - ხელი შეუწყონ დემოკრატიული ცვლილებების განხორციელებას, რომელიც თავისუფალი მართლმსაჯულების სისტემის ჩამოყალიბებას ხელს შეუწყობს. თეა წულუკიანის თქმით, იმ ფონზე, რომ პრეზიდენტმა ისუტიციის საბჭოს მოქმედი წევრებისთვის უფლებამოსლების შეჩერებას და მათი ახალი წესის არჩევის კანონპროექტს ვეტო დაადო, ხოლო პარლამენტის მიერ ვეტოს დაძლევა პროცესს გაახანგრძლივებს, მოსამართლეებს შეეძლებათ ეს დრო გონივრულად გამოიყენონ და თავისი კანდიდატურების კამპანიაზე იზრუნონ

საქართველოს პრემიერის ბიძინა ივანიშვილის განცხადებით, საერთაშორისო თანამეგობრობის ჩართულობა სამხრეთ კავკასიაში არსებულ კონფლიქტებში ძალიან მნიშვნელოვანია, ვინაიდან სამი რეგიონული კონფლიქტის მოგვარება, მათ გარეშე შეუძლბელია.ივანიშვილის თქმით, რეგიონში ჯერ კიდევ არსებობს კონფლიქტების საშიშროება და ჯერჯერობით სამხრეთ კავკასია არ არის მშვიდობის ზონა. ამის შესახებ ივანიშვილმა სასტუმრო „ქორთიარდ მერიოტში“ ნატოს საპარლამენტო ანსამბლეის ორგანიზებით მიმდინარე სემინარზე სიტყვით გამოსვლისას განაცხადა.პრემიერმა ხაზი გაუსვა საქართველოს ევროატლანტიკურ მისწრაფებას და აღნიშნა, რომ ეს გზა ქართველი ერისთის შეუცვლელია. ივანიშვილის თქმით, ევროპა და ნატო ქართველმა ხალხმა ჯერ კიდევ 10 წლის წინ აირჩია, ამიტომ ვერც ერთი მთავრობა ვერ შეძლებს ამ არჩევანის შეცვლას.ივანიშვილის თქმით, ახალი ხელისუფლება ყველაფერს გააკეთებს იმისთვის, რომ ბუქარესტის სამიტზე საქართველოსთვის სასურველი გადაწყვეტილება მიიღონ. პრემიერმა 2008 წლის აგვისტოს ომის შემდეგ ნატოს მხარდაჭერაზე გააკეთა აქცენტი და აღნიშნა, რომ 2008 წლის სექტემბერში ჩრდილოატლანტიკური საბჭოს ვიზიტი ქართველი ხალხისთვის მნიშვნელოვანი მხარდაჭერა იყო.ივანიშვილის თქმით, 2008 წელს განხორციელდა ქართველების ეთნიკური წმენდა. მისივე თქმით, ეთნკური წმენდა მოხდა აფხაზეთშიც. პრემიერის განცხადებით, მიუხედავად ამისა საქართველოს ახალმა ხელისუფლებამ საგარეო პოლიტიკაში ახალი კომპონენტი შეიტანა და რუსეთთან ურთიერთობების განახლება გადაწყვიტა.ამ კუთხით ივანიშვილმა ხაზი გაუსვა რუსეთთან ურთიერთობაში მისი სპეციალური წარმომადგენლის დანიშვნას. პრემიერის თქმით, მიუხედავად იმისა, რომ საქართველო ცდილობს რუსეთთან ურთიერთობის აღდგენას, ეს არ ნიშნავს რომ ჟენევის მოლაპარაკებები საჭირო აღარ არის.