თბილისში გუშინ მომხდარ ძალადობრივ ფაქტებზე შსს-მ გამოძიება უკვე დაიწყო.

ამის შესახებ შსს-ს საზოგადოებასთან ურთიერთობის დეპარტამენტის ხელმძღვანელმა ნინო გიორგობიანმა განაცხადა. მისივე თქმით, გუშინდელ აქციასთან დაკავშირებით სამინისტრომ მყისიერი რეაგირება მოახდინა.

გიორგობიანი აცხადებს, რომ კონკრეტული პირების მიმართ დაწყებულია რამდენიმე სისხლის სამართლის საქმე და ასევე, რამდენიმე ადმინისტრაციული სამართალწარმოება.

ევროვიზიის ფინალი დღეს გაიმართება. უკვე ცნობილია რომ 58-ე ევროფესტივალის ფინალში ქართველი მონაწილეები სოფო გელოვანი და ნოდიკო ტატიშვილი მიიღებენ მონაწილეობას.

ევროვიზიის სიმღერის კონკურსის წესის შესაბამისად, ფინალში ავტომატურად მასპინძელი ქვეყნის შვედეთის და "დიდი ხუთეულის" (გერმანია, დიდი ბრიტანეთი, საფრანგეთი, ესპანეთი, იტალია) წარმომადგენლები - შვედეთი, დიდი ბრიტანეთი, გერმანია, იტალია, საფრანგეთი და ესპანეთი გადადიან.

მეორე ნახევარფინალური ტურის გამარჯვებულები ჟიურიმ და ევროპელმა მაყურებელმა ხმის მიცემის შედეგად ერთობლივად (50%/50%) გამოავლიეს.

საერთაშორისო უფლებადამცველი ორგანიზაცია "Amnesty International" თბილისში გუშინ განვითარებულ მოვლენებს ეხმიანება.

ორგანიზაციის შეფასებით, თბილისში პოლიციამ ვერ შეძლო ლგბტ აქტივისტების დაცვა ათასობით ადამიანის თავდასხმისგან, ორგანიზებულ ჰომოფობიას კი არაეფექტური პასუხი გასცა. 

ძალადობის გამო 17 ადამიანი დაშავდა, რომელთაგან 12-ის ჰოსპიტალიზაცია გახდა აუცილებელი. დაშავებულთა შორის 3 პოლიციელი და ერთი ჟურნალისტია.

"ირონიულად, ეს სამარცხვინო ძალადობა დაემთხვა დღეს, როდესაც მსოფლიოში ჰომოფობიის წინააღმდეგ სოლიდარობას გამოხატავენ. ეს აჩვენებს, რომ საქართველოს ხელისუფლებას გრძელი გზა აქვს გასავლელი შემწყნარებლობის ხელშეწყობისა და ლგბტ ჯგუფებისა უფლებების დაცვის კუთხით", - ნათქვამია განცხადებაში.

"ხელისუფლებამ უნდა გამოიძიოს ძალადობის ფაქტები და პასუხი აგონ მათ, ვინც კანონით დასჯადი ქმედება ჩაიდინა", - აღნიშნავს ორგანიზაციის ევროპისა და შუა აზიის პროგრამის ხელმძღვანელი ჯონ დალ-ჰუისენი.

რადიო „აფხაზეთის ხმის“ ექსკლუზიური ინფორმაციით, ამ წუთებში რუსთაველის გამზირზე, „სმარტის“ წინ საპატრულო პოლიციის ორი ეკიპაჟი და დაცის პოლიციაა კონცენტრირებული, სადაც ათამდე მოზარდმა ორი გოგო და ორი ბიჭი სცემა.

„აფხაზეთის ხმის“ კორესპონდენტი შემთხვევის ადგილიდან იტყობინება, რომ „რედისონის“ მხრიდან ოპერის მიმართულებით მიმავალ ორ ბიჭსა და ორ გოგოს მოულოდნელად თავს დაესხა პლასტმასის ბოთლებითა და ჯოხებით შეიარაღებული ათამდე მოზარდი, რომლებიც ბიჭებს „პიდარასტებს“, გოგონებს კი „ლესბიანკებს“ უწოდებდნენ და ჯოხით სცემდნენ.

ოთხ პირზე აგრესიული მოზარდების თავდასხმის მიზეზი, სავარაუდოდ, ერთ-ერთი ბიჭის გრძელი თმა გახდა: დევნის დროს მოზარდებმა განსაკუთრებული აგრესია მის მიმართ გამოიჩინეს. „შენი გრძელთმიანი პიდარასტი დედას შევ***“, - ყვიროდნენ მოზარდები.

ოთხმა პირმა თავს გაქცევით უშველა და „სმარტში“ შევარდა, თუმცა მოზარდები მათ თან შეჰყვნენ და აგრესიული ქმედება გააგრძელეს, რასაც „სმარტის“ პერსონალის მხრიდან ღილაკ „განგაშის“ ჩართვა მოჰყვა. ამის შემდეგ აგრესიულ მოზარდთა უმრავლესობა გაიქცა, ხოლო განგაშის შემთხვევის გამო ადგილზე რამდენიმე წუთში მისულმა დაცვის პოლიციის შეიარაღებულმა ჯგუფმა ორი ეჭვმიტანილი დააკავა და თითქმის პარალელურად მოსულ საპატრულო პოლიციას გადასცა.

ამ წუთებში „სმარტის“ წინ იმყოფებიან როგორც დაზარალებულები, ასევე თავდასხმაში ეჭვმიტანილი ერთი მოზარდიც. პოლიცია მის მეურვეებთან დაკავშირებას ცდილობს და მომხდარი ფაქტის შესახებ ოქმს ადგენს. დაზარალებულებმა კომენტარისგან თავი შეიკავეს. ასევე არ აკეთებენ კომენტარს საპატრულო პოლიციის წარმომადგენლებიც. 

ფოტო გადაღებულია შემთხვევის ადგილზე, "აფხაზეთის ხმის" კორესპონდენტის მიერ.

ამ დროისთვის თბილისის ცენტრში, სხავადასხვა წერტილებში მომხდარი რამდენიმე ინციდენტის შედეგად  17 ადამიანი დაშავდა, მათგან სამი პოლიციელია. 12 დაშავებული სხვადასხვა კლინიკაშია გადაყვანილი.  დაახლოებით 40 წუთის წინ რუსთაველის გამზირზე შს მინისტრი ირაკლი ღარიბაშვილი იმყოფებოდა, თუმცა, მას ჟურნალისტებთან კომენტარი არ გაუკეთებია.

„შსს მოუწოდებს მოქალაქეებს დაიშალონ, ანუ ნუღარ დაიკავებენ ცენტრალურ მაგისტრალებს“, - ამის შესახებ განცხადება „რუსთავი2“-ის პირდაპირ ეთერში შსს-ს საზოგადოებასთან ურთიერთობის დეპარტამენტის უფროსმა ნინო გიორგობიანმა გააკეთა.

ნინო გიორგობიანი აცხადებს, რომ მოგვიანებით, ინფორმაციის გადამოწმების შემდეგ შსს ოფიციალურ განცხადებას გააკეთებს. ამასთან, კითხვაზე, რა აზრისაა სახალხო დამცველის განცხადებაზე, რომელიც ამბობს, რომ პოლიციამ კორდონი ვერ შეინარჩუნა, გიორგობიანმა განაცხადა, რომ ამ თემაზე კომენტარს ვერ გააკეთებს.

რუსთაველის გამზირზე მივიდა სახალხო დამცველი უჩა ნანუაშვილიც, თუმცა, მისი პოზიციის გამო მას ანტიაქციის მონაწილეები აგრესიულად შეხვდნენ, რის შემდეგაც პოლიციამ შემთხვევის ადგილს კორდონის თანხლებით გაარიდა.

რუსთაველზე რამდენიმე სასწრაფო დახმარების ეკიპაჟია მობილიზებული, დაშავებულებს ადგილზე უტარდებათ პირველადი სამედიცნო დახმარება.

აქციის მონაწილეებმა კოლმეურნეობის მოედნიდან ორთაჭალამდე, რესტორან ,,კრწანისამდე“ სდიეს, შემდეგ კი უკან მობრუნდნენ ,რადგან გზად პოლიციამ მოახერხა და ფონიჭალაში, ქალაქგარეთ, ფონიჭალის ტერიტორიაზე ყვითელი ავტობუსებით გაიყვანეს "იდენტობის" წევრები, ლგბტ პირები და აქციის სხვა მონაწილეები.

დაზიანებულია ყვითელი ავტობუსები, რომელთაც ლგბტ აქციის მხარდამჭერები გადაჰყავდათ, მათ ჰომოფობიის წინააღმდეგ აქციის გამართვის მოწინააღმდეგეებმა ვაჩნაძის ქუჩაზე ქვები დაუშინეს. დაზიანდა მანქანები, რომლებიც პარკირების ადგილზე იდგნენ. სხვადასხვა მედიასაშუალების ჟურნალისტების ცნობით, აგრესიული მოქალაქეები ჯოხებით დარბოდნენ, მაღაზიებში შედიოდნენ და ლგბტ პირებს ეძებდნენ.

კოლმეურნეობისმოედანზე დაპირისპირებისას 15 ამდე ადამიანია დაშავებული, აქციის ერთ-ერთ მონაწილეს ფეხი აქვს მოტეხილი და ე. წ. არამიანცის საავადმყოფოში გადაჰყავთ. დაშავებულთა ნაწილი გადაყვანილია სამედიცინო დახმარების პუნქტებში. დაშავებულთა შორის ჟურნალისტებიც არიან. სასტიკადაა ნაცემი „ნიუპოსტის“ კორესპონდენტი თინა თაყაძე, დაშავდა რადიო „ფორტუნას“ ჟურნალისტი ხატია კალანდაძე.

დაპირისპირების დროს დაშავდნენ პოლიციელები. ერთ-ერთი დაზარალებული პოლიციელის მდგომარეობა გართულდა და კოლეგებმა იგი პირველი დახმარების გაწევის შემდეგ კლინიკაში გადაიყვანეს.

„გავეშებულმა ბრბომ გამოანგრია პოლიციის კორდონი და რაც მე იქ მერე ვიხილე, ეს იყო ძალადობის დღესასწაული - ძალადობის წინააღმდეგ გამოსვლა იქცა ძალადობის დღესასწაულად“, -

ამის შესახებ „რუსთავი2“-ის ეთერში ჟურნალ „ტაბულას“ რედაქტორმა თამარ ჩერგოლეიშვილმა განაცხადა. მისი თქმით, პოლიციამ ვერ შეძლო აქციის მონაწილეთა უსაფრთხოების უზრუნველყოფა:

„ამისთვის პასუხისმგებლობა ეკისრება შს სამინისტროს პირველ პირს, რომელმაც ვერ დაგეგმა ოპერაცია. რუსთაველზე არ იყო საკმარისი რაოდენობით პოლიციელი, რითაც მინისტრმა საფრთხეში ჩააგდო არამარტო აქციის მონაწილეები, არამედ თავისი პოლიციელებიც.

ეს არ იყო არავითარი გეი-აღლუმი, როგორც ამას ბევრი აცხადებს, ეს იყო სექსუალური უმცირესობის მიმართ ძალადობის პროტესტი, თანაც, პარლამენტის შენობის წინ აქციის მონაწილეები არც მისულან: ისინი პუშკინის სკვერში შეიკრიბნენ. რაც შეხება პარლამენტის წინ მიმდინარე აქციას, ის იყო უკანონ, ვინაიდან კანონით მხოლოდ იმ შემთხვევაშია დაშვებული აქციის გამართვა ამა თუ იმ ადგილას, როცა იქ სხვა აქცია არ არის დაანონსებული.

მომხდარზე პასუხისმგებლობა ეკისრება ასევე უმრავლესობას, რომელსაც საკუთარ რიგებში ჰყავს აგრესიული პირები, ვინც ძალადობას ამართლებს“, - განაცხადა თამარ ჩერგოლეიშვილმა.

შეგახსენებთ, რომ სიტუაცია პუშკინის სკვერთან მას შემდეგ დაიძაბა, რაც 17 მაისის ანტიაქციის წევრებმა თავისუფლების მოედანთან არსებული პოლიციის კორდონი გაარღვიეს და პუშკინის სკვერში შეიჭრნენ. ანტიაქციის მონაწილეებმა ფიზიკური შეურაცხყოფა მიაყენეს ლგბტ ორგანიზაციების წარმომადგენლებს, რომლებმაც პარლამენტის ყოფილ შენობასთან მისვლა გადაიფიქრეს და ფლეშმობს პუშკინის სკვერში მართავდნენ. პოლიციამ რამდენიმე ადამიანი უკვე დააკავა.

რადიო "აფხაზეთის ხმის" საინფორმაციო სამსახური

შენიშვნა: გამოყენებულია "ტაბულას" ფოტო

17 მაისის დადგომას სასულიერო პირებისა და მრევლის ნაწილი რუსთაველის გამზირზე, პარლამენტის ყოფილი შენობის წინ შეხვდა.

ავღანეთში დაღუპული ქართველი სამხედრო პირები პანაშვიდის დასრულების შემდეგ მათ ქაშუეთის ეკლესიიდან პირდაპირ ყოფილი პარლამენტის შენობიოს წინ გადაინაცვლეს და პარაკლისი გადაიხადეს. აქციის მონაწილეებს თან ჰქონდათ სხვადასხვა შინაარსის პლაკატები. ერთ-ერთზე ეწერა: „ჰომოსექსუალიზმი ერის გენოციდია“.

ლგბტ პირებისა და მოძრაობა „იდენტობის“, ასევე მოქალაქეთა ნაწილის მიერ დაანონსებული აქცია 17 მაისს ჰომოფობიისა და ტრანსფობიის საწინააღმდეგო დღესთან დაკავშირებით გარკვეული პირებისა და პოლიტიკური, საზოგადოებრივი ორგანიზაციების მხრიდან პროტესტის საგნად იქცა.

რუსთაველის გამზირზე სასულიერო პირები და მრევლის ნაწილი მთელი ღამის განმავლობაში დარჩა. ადგილზე იყო ასევე მობილიზებული საპატრულო პოლიციაც. დილიდან ყოფილი პარლამენტის შენობის წინ პოლიციელთა დამატებითი კონტიგენტი გამოჩნდა.

17 მაისის აქციისადმი აღმასრულებელი და საკანონმდებლო ხელისუფლების პოზიცია უკვე გამოკვეთილია: მთავრობის მეთაურმა ბიძინა ივანიშვილმა განაცხადა, რომ ნებისმიერი უმცირესობის უფლებები უნდა იყოს დაცული: „ისინი ისეთივე მოქალაქეები არიან, როგორც ჩვენ“, - აღნიშნა პრემიერმინისტრმა და ხაზი გაუსვა, რომ 17 მაისს პოლიცია მოწოდების სიმაღლეზე იდგება.

პარლამენტის თავმჯდომარემ დაახლოებით იგივე პოზიცია გამოხატა და აღნიშნა, რომ 17 მაისის აქციის გაუქმების წინააღმდეგია.

აქციის გაუქმების თხოვნით საქართველოს საპატრიარქომ გუშინ მიმართა თბილისის მერიას. თბილისის მერიამ საპასუხო განცხადებაში მიუთითა, რომ აქციას ვერ გააუქმებს, რადგან მისი ჩატარებისთვის ნებართვა არ მიუცია: მსგავსი აქციების ჩატარების დროს კანონი არ ითვალისწინებს ნებართვის გაცემას ხელისუფლების რომელიმე ორგანოს მხრიდან - აქციის იდეის ავტორებს მხოლოდ მათი დაუწყება ევალება, რაც 17 მაისის აქციის ორგანიზატორებმა უკვე გააკეთეს.

ცოტა ხნის წინ ცნობილი გახდა, რომ ლგბტ პირებსა და 17 მაისის აქციის სხვა მონაწილეებს ქართველ ფემინისტთა დამოუკიდებელი ჯგუფი შეუერთდა. ამავე დროს, ლგბტ აქციის საწინააღმდეგო აქციას, რომელიც რუსთაველის გამზირზე ჯერ კიდევ გუშინ ღამით დაიწყო, შეუერთდნენ „ეროვნული ფორუმის“ წევრები.

ჰომოფობიისა და ტრანსფობიის წინააღმდეგ აქციის ჩატარება 13:00 საათზეა დაანონსებული.

რადიო „აფხაზეთის ხმის“ საინფორმაციო სამსახური

გამოყენებულია "ლიბერალის" ფოტო.

საპარლამენტო უმრავლესობის წევრი ეკა ბესელია განმარტავს, რომ არა ავღანეთიდან ქართველი სამხედროების გამოყვანის, არამედ მათი რიცხვის შემცირების მომხრეა:

"ვუსამძიმრებ ყველა გარდაცვლილი ჯარისკაცის ოჯახს...საქართველომ დიდი ,მსხვერპლი გაიღო დღესაც და ამ წლებშიც... მე დღეს ვთქვი რომ დავიწყოთ ფიქრი და საუბარი არის კი საჭირო ამ რაოდენობის ჯარისკაცის გაგზავნა ავღანეთში, მაშინ როცა ბევრმა ქვეყანამ შემაცირა თავისი სამხედრო კონტიგენტი და არ მითქვამს ის რაც გაავრცელა რამდენიმე სააგენტომ, რომ ვიფიქროთ საჭიროა თუ არა საერთოდ მონაწილეობა ქართული ჯარის ავღანეთში...მგონი არის განსხვავება!", - წერს ეკა ბესელია და მიიჩნევს, რომ მისი ადრინდელი განცხადება ზოგიერთმა მედიასაშუალებამ ინტერპრეტირებული სახით გაავრცელა.

აშშ-ში ვიზიტით მყოფი მიხეილ სააკაშვილის აზრით, საქართველოს მოქმედ ხელისუფლებას უჭირს დამალოს ის მიღწევები, რასაც ქვეყანამ წინა მთავრობის დროს მიაღწია.

"საქართველოს მთავრობამ მთლიანად შეიცვალა ტონი. პრემიერ-მინისტრმა განაცხადა, რომ საქართველოს თურმე ჰქონია ძალიან კარგი საბაჟო და საგადასახადო სისტემა და პარლამენტში ყოფნისას მთავრობის წარმომადგენლებმაც აღნიშნეს, რომ ჩვენ მსოფლიო ბანკის რეიტინგებში ვართ მე-9 ადგილზე.

ერთი სიტყვით, ის, რასაც მთელი თვეების განმავლობაში ჩვენი მთავრობა ეძახდა სიცრუეში ცხოვრებას და ჩვენს პიარს და იმას, თითქოს ჩვენ მსოფლიოს ვატყუებდით, ახლა შეიცვალა. იმ ფონზე, როცა გაუჭირდათ, ინვესტიციები აღარ შემოდის და ყველაფერი გაჩერდა, მოუხდათ ამის აღიარება", - განაცხადა სააკაშვილმა.

ქვეყნის პირველი პირი რუსეთის მიერ აზერბაიჯანთან მიმართებაში მიღებულ გადაწყვეტილებასაც შეეხო და აღნიშნა, რომ აზერბაიჯანის მხარდაჭერა საქართველოს ეროვნულ ინტერესებშია: "რუსეთის მთავრობამ გამოაცხადა, რომ აზერბაიჯანის ნავთობს აღარ გაატარებს თავის ტერიტორიაზე. ახლა მთავარი სამიზნე არის აზერბაიჯანი, რასაც მე დიდი ხანია, ვამბობ.

თუ აზერბაიჯანი დაეცა, მაშინ რეგიონს პერსპექტივა მოესპობა და პირიქით, თუ აზერბაიჯანი გაძლიერდება და გააგრძელებს განვითარებას, ჩვენ ბევრად უკეთესი პერსპექტივა გვექნება მომავლისთვის და ეს რუსეთის დღევანდელმა მთავრობამ მშვენივრად იცის. თავის დროზე, როცა რუსებმა ჩვენ დენი და გაზი ჩაგვიკეტეს, აზერბაიჯანმა თავისი მოსახლეობა "გათიშა" და საქართველოს გაუყო საკუთარი ელექტროენერგია. ამით დიდი რაღაც გაგვიკეთა. ამიტომ დღეს, როგორც არასდროს, ჩვენ უნდა გამოვიჩინოთ აზერბაიჯანის მიმართ სოლიდარობა. ეს არის ჩვენს სტრატეგიულ ინტერესებში", - აცხადებს საქართველოს პრეზიდენტი.

სასულიერო პირები, მორწმუნეები და საინიციატივო ჯგუფ „დაიცავი ზნეობის" მხარდამჭერები ღამეს რუსთაველის გამზირზე, პარლამენტის ყოფილ შენობასთან გაატარებენ.

შეგახსენებთ, ეს ის ადგილია, სადაც 17 მაისს არასამთავრობო ორგანიზაცია „იდენტობის" მიერ ჰომოფობიის წინააღმდეგ ბრძოლის საერთაშორისო დღესთან დაკავშირებით დაგეგმილი აქცია 13:00 საათზეა დაანონსებული.

17 მაისს ჰომოფობიასთან და ტრანსფობიასთან ბრძოლის მსოფლიო დღე აღინიშნება. ორგანიზაცია ”იდენტობის” ორგანიზებით, ხვალ ლგბტ–ის წარმომადგენლები და მათი უფლებადამცველები საქართველოშიც შეიკრიბებიან. ისინი ჰომოფობიას და ძალადობას 20-წუთიანი აქციით დაგმობენ.

პარალელურად იგეგმებოდა მათი საწინააღმდეგო აქციის გამართვაც, თუმცა, როგორც ამ წუთებში პარლამენტის ყოფილი შენობის წინ შეკრებილი სასულიერო პირები აცხადებენ, მათ გადაწყვეტილება შეცვალეს და გადაწყვიტეს, შენობის წინ ადგილები აქედანვე დაიკავონ. ამ წუთებში რუსთაველის გამზირზე პარაკლისი მიმდინარეობს.

რადიო "აფხაზეთის ხმის" საინფორმაციო სამსახური

"პრაქტიკაში არ არსებობს ზოგადად ადამიანისთვის ოთხჯერ აღკვეთის ღონისძიების შეფარდება“, - ამის შესახებ გიორგი ონიანმა განაცხადა.

„თავისუფლებისა და მხარდაჭერის ცენტრის“ წარმომადგენელმა „პრაიმტაიმის“ პრესკლუბში ბაჩო ახალაიასთვის სასამართლოს მიერ ოთხჯერ აღმკვეთი ღონისძიების შეფარდებაზე ისაუბრა:

„ყველა წესისა და კანონის დაცვით ახალაია გირაოთი უნდა განთავისუფლებულიყო, რადგანაც ის არ ემალებოდა გამოძიებას. ფაქტია, რომ თავიდან ბოლომდე დარღვევებით მიმდინარეობს მასთან დაკავშირებული პროცესი და ამიტომაც საქმე სტრასბურგის სასამართლოში გადაიგზავნა",-განაცხადა გიორგი ონიანმა.

რადიო "აფხაზეთის ხმის" საინფორმაციო სამსახური