ვანო მერაბიშვილის ადვოკატმა სასამართოს გადაწყვეტილება საქმე შესაძლოა სტრარსბურგში გაასაჩივროს.

როგორც მერაბიშვილსი ადვიკატმა გიორგი ჩივიაშვილმა ნაციონალური მოძრაობის გენერალურ მდივანტან შეხვედრის შემდეგ განაცხადა, მერაბიშვილთან საუბარი ჰქონდა იმაზე, თუ რა ფორმატში უნდა გაგრძელდეს მისი დაცვა. მისი თქმით, საუბარი სტრასბურგის სასამართლოსაც შეეხო, თუმცა ამ საკითხთან დაკავშირებით საბოლოო გადაწყვეტილება ჯერ არ არის მიღებული. "ჩვენ ასევე გავიარეთ შემდეგი სტრატეგია, რა ფორმატში განვაგრძობთ დაცვის უფლების განხორციელებას. საქართველოში გასაჩივრების შესაძლებლობა უკვე ამოწურულია. გვაქვს ექვსთვიანი ვადა სტრასბურგში გასაჩივრებისთვის, თუმცა სტრასბურგთან დაკავშირებით ბოლომდე ჯერ არ ვართ ჩამოყალიბებული და ეს საკითხი განხილვის პროცესშია", - განაცხადა ჩივიაშვილმა.

ადვოკატმა ასევე აღნიშნა, რომ ვანო მერაბიშვილი თავს კარგად გრძნობს,საკანში მარტო იმყოფება და ადმინისტრაციასთან პრეტენზია არ აქვს.

თბილისში, პეტრიაშვილის ქუჩაზე გვიან ღამით დასრულდა საცხოვრებელი სახლის ჩხრეკა, სადაც ბოლო პერიოდში ვანო მერაბიშვილი ოჯახთან ერთად ცხოვრობდა.

სამართალდამცველებმა სახლიდან წაიღეს სხვადასხვა ნივთები და ამოღებული ფული. წაღებულია ნოუთბუქები და მეხსიერების ბარათები.

საღამოს განმავლობაში ვრცელდებოდა სხვადასხვა ვერსია მერაბიშვილის საცხოვრებელი ადგილიდან ასობით ათასი ევროს ამოღების შესახებ, რაც საბოლოოდ, არ დადასტურდა.

ვანო მერაბიშვილის ადვოკატის გოგიტა გაბაიძის ინფორმაციით, ბინიდან ამოღებულია 33 ათასი აშშ დოლარი და 29 ათასი ლარი, რაც თაკო სალაყაიასა და ვანო მერაბიშვილის დანაზოგი იყო, ასევე წაღებულია თაკო სალაყაიას დედის კუთვნილი 54 ათასი ევრო, რომელიც მერაბიშვილის სახლში ინახებოდა მას შემდეგ, რაც მისმა სიდედრმა ბინა გაყიდა.

ადვოკატი აცხადებს, რომ პროკურატურას ამ თანხის დაბრუნება მოუწევს, რადგან იმის დამადასტურებელ დოკუმენტაციას, რომ თანხა სახლის გაყიდვიდანაა მიღებული, საგამოძიებო ორგანოებს დღეს გადასცემს. 

ვანო მერაბიშვილისა და ზურაბ ჭიაბერაშვილის სასამართლო პროცესი, რომელიც აღკვეთის ღონისძიების ფორმაზე იმსჯელებს, ქუთაისში დღეს გაიმართება.

ბრალდების მხარე ორივე დაკავებულისთვის წინასწარი ორთვიანი პატიმრობის შეფარდებას ითხოვს. ბრალდებულთა ადვოკატები აცხადებენ, რომ მათი დაცვის ქვეშ მყოფები არათუ არ აღიარებენ ბრალს, არამედ ბრალდებას არასერიოზულად და სასაცილოდ მიიჩნევენ.

მათი თქმით, მერაბიშვილისა და ჭიაბერაშვილის დაკავების არანაირი რეალური საფუძველი არ არსებობს. სასამართლო პროცესი, რომელიც დღეს ქუთაისში გაიმართება, სავარაუდოდ, დაიხურება. ამასთან, არ არის გამორიცხული, “ნაციონალური მოძრაობის” იმერეთის ორგანიზაციამ ვანო მერაბიშვბილისა და ზურაბ ჭიაბერაშვილის გათავისუფლების მოთხოვნით ქუთაისში მიტინგი გამართოს.

თანამდებობის ბოროტად გამოყენება, ამომრჩევლის მოსყიდვა, ბიუჯეტის კუთვნილი თანხის გაფლანგვა და სხვისი კერძო საკუთრების მითვისება, - ამ ოთხი მუხლით წაუყენეს ბრალი ქუთაისში ვანო მერაბიშვილს. რაც შეხება ზურაბ ჭიაბერაშვილს, მას ბრალი სამი მუხლით ედება - თანამდებობის ბოროტად გამოყენება, ამომრჩევლის მოსყიდვა და ბიუჯეტის კუთვნილი თანხის გაფლანგვა.

ვანო მერაბიშვილის მიმართ წაყენებული ბრალდებები, დამტკიცების შემთხვევაში, 7-დან 12 წლამდე პატიმრობას ითვალისწინებს. არცერთი დაკავებული ბრალს არ აღიარებს. სასამართლო დღის განმავლობაში იმსჯელებს აღმკვეთი ღონისძიების ფორმაზე. ბრალდების მხარე ორივე ეჭვმიტანლისთვის ორთვიანი წინასწარი პატიმრობის შეფარდებას ითხოვს.

აშშ-ის სახელმწიფო დეპარტამენტის პირველ კომენტარს ვანო მერაბიშვილისა და ზურაბ ჭიაბერაშვილის დაკავებასთან დაკავშირებით რადიო „თავისუფლება“ აქვეყნებს.

რადიო “თავისუფლებამ” თხოვნით მიმართა აშშ-ის სახელმწიფო დეპარტამენტს, კომენტარი გაეკეთებინა ”ერთიანი ნაციონალური მოძრაობის” გენერალური მდივნის, ყოფილი პრემიერ-მინისტრის, ვანო მერაბიშვილისა და კახეთის გუბერნატორის, ჯანდაცვის ყოფილი მინისტრის, ზურაბ ჭიაბერაშვილის დაკავებაზე. სახელმწიფო დეპარტამენტის წარმომადგენელმა განაცხადა, რომ აშშ გულდასმით ადევნებს თვალყურს ყოფილი ხელისუფლების წარმომადგენელთა დაპატიმრებებსა და მათი საქმეების გამოძიებას.

მისი სიტყვებით, აშშ-მა საქართველოს მთავრობას მკაფიოდ უთხრა, რამდენად მნიშვნელოვანია ამგვარი გამოძიებებისა და სასამართლოს წესით დევნის განხორციელება პროცედურის სრული დაცვით და რომ დაუშვებელია პოლიტიკური ანგარიშსწორება:

„ამერიკის შეერთებული შტატები ყველა პოლიტიკურ მოთამაშეს მოუწოდებს, გააგრძელონ კონსტრუქციული თანამშრომლობა საერთო მიზნისკენ - საქართველოს დემოკრატიული და ეკონომიკური განვითარებისა და ევროატლანტიკური ინტეგრაციისკენ - მიმავალ გზაზე“, განუცხადა რადიო თავისუფლებას აშშ-ის სახელმწიფო დეპარტამენტის წარმომადგენელმა.

მარჯანიშვილის ქუჩაზე მდებარე რუსულ ეკლესიასთან გუშინ, დაახლოებით 23.00 საათზე სამი მამაკაცი სასტიკად გაუსწორდა 20-22 წლის ბიჭს.

სავარაუდოდ, გამვლელის მიმართ გამოჩენილი აგრესია მისმა ჩაცმულობამ და სიარულის მანერამ გამოიწვია. როგორც „აფხაზეთის ხმამ“ მარჯანიშვილის ქუჩაზე მდებარე ერთ-ერთი მაღაზიის გამყიდველმა უთხრა, ტროტუარზე დაგდებულ ბიჭს სამი ბიჭი წიხლებს ურტყამდა და „პიდარასტს“ უძახდა:

„მე გამოვედი და ყვირილი დავიწყე, რას შვრებით, შვილებო, მასე ხომ მოკვდება-მეთქი. სულ სისხლში იყო ამოთხვრილი და კვნესოდა, ესენი კი ფეხებს ურტყამდნენ დაუნდობლად. ვეხვეწე - არ მოკლათ, ცოდოა-მეთქი და ერთი მომიბრუნდა: ამათ ყოველდღე ასე უნდა ურტყა, ცოტა აზრზე რომ მოვიდნენო. იქ ხომ ვიწრო ქუჩაა და მანქანები ნელა მოძრაობდნენ, გამოვარიდე საცოდავი ბიჭი და ერთ ტაქსში ჩავსვი, რამდენიმე გამვლელიც გამოჩნდა, რომელმაც ჩემი მხარე დაიკავა და თავდამსხმელებს შეუტია“, - ამბობს ქალი, რომელმაც ვინაობის დასახელება არ ისურვა.

ინფორმაცია მარჯანიშვილის ქუჩაზე მომხდარი თავდასხმის შესახებ სოციალურ ქსელში „იდენტობის“ წარმომადგენელმა ირაკლი ვაჭარაძემაც გაავრცელა. მისი თქმით, ასეთი შემთხვევები თბილისში გახშირებულია.

თბილისში 17 მაისის შემდეგ გამოვლენილი რამდენიმე მსგავსი შინაარსის თავდასხმის შესახებ სახალხო დამცველის განცხადებაშიცაა აღნიშნული, სადაც უჩა ნანუაშვილი 17 მაისს მომხდარი ფაქტების გამოძიების გაგრძელებას ითხოვს:

„როგორც გამოკითხული პირები აცხადებენ საქართველოს სახალხო დამცველის რწმუნებულებთან, 17 მაისიდან დღემდე ადგილი აქვს მათ მიმართ სხვადასხვა კანონსაწინააღმდეგო ქმედებებს. კერძოდ, მათი განმარტებით, ადგილი აქვს განსხვავებული გარეგნობის და შეხედულებების გამო მათ დევნას, ფიზიკურ და ვერბალურ შეურაცხყოფას, ძალადობასა და მუქარას (თმაზე ცეცხლის წაკიდება, ქვების სროლა, საზოგადოებრივ ტრანსპორტში შევიწროვება, ორგანიზაციის ოფისში შეჭრის მცდელობა, ინდივიდუალური საცხოვრებელი მისამართების გარკვევა სავარაუდო ანგარიშსწორებისათვის ა.შ.). რამდენიმე პირი ასევე აღნიშნავს, რომ ქუჩასა თუ საზოგადოებრივ ტრანსპორტში გადაადგილებაც მომეტებული საფრთხის შემცველია. ზოგიერთმა მათგანმა შეიცვალა საცხოვრებელი სახლიც, ვინაიდან დაცული არ არის მათი უსაფრთხოება. თითოეული მათგანი, აღნიშნულ ქმედებებს მათ 17 მაისის აქციაში მონაწილეობასა და კონკრეტულ ლგბტ ჯგუფთან გაიგივებას უკავშირებს“, - აღნიშნულია სახალხო დამცველის განცხადებაში.

საქართველოს პრეზიდენტის ადმინისტრაციის ცნობით, ვანუატუმ გააუქმა აფხაზეთის დამოუკიდებელ ქვეყნად აღიარების შესახებ 2011 წელს მიღებული გადაწყვეტილება.

თავდაპირველად ამის შესახებ „ფეისბუქზე“ საქართველოს პრეზიდენტის ოფიციალურ გვერდზე განახლებული ე.წ. “ქავერის” ფოტოს წარწერიდან გახდა ცნობილი. გარეკანის ფოტოზე გამოსახულნი იყვნენ საქართველოს პრეზიდენტი მიხეილ სააკაშვილი და ვანუატუს პრემიერმინისტრი მოანა კარკასესი, რომელიც ქვეყნის პირველი პირია 2013 წლის მარტის ბოლოდან. რაც შეეხება აფხაზეთის აღიარებას, გადაწყვეტილება ამის შესახებ ვანუატუს წინა პრემიერმინისტრმა მიიღო.

ცნობა ვანუატუს მიერ აღიარების უკან წაღების შესახებ დაადასტურა საქართველოს პრეზიდენტის ადმინისტრაციამ. შეგახსენებთ, რომ ვანუატუ, ტუვალუ და ნიკარაგუა პირველი სახელმწიფოები იყვნენ, რომლებმაც რუსეთის შემდეგ, აფხაზეთის დამოუკიდებლობა აღიარეს.

15 მაისს, ხელვაჩაურის მუნიციპალიტეტში ე.წ მესამე გოროდოკის დასახლებაში 17 წლის მოზარდი გააუპატიურეს.

შემთხვევა ღამით, 22:30 საათზე მოხდა. ეჭვმიტანილმა მოზარდი სახლიდან მოტყუებით გამოიყვანა და კორპუსიდან მოშორებით ავტოფარეხების უკან გაიყვანა. შემთხვევის ადგილს დედამ მეზობლების დახმარებით რამდენიმესაათიანი ძებნის შედეგად მიაკვლია.

როგორც მეზობლები აცხადებენ, ეჭვმიტანილი, მანამდე ციხეში ყაჩაღობის ბრალდებით იხდიდა სასჯელს. რამდენიმე თვის წინ გათავისუფლდა და ამავე დასახლებაში, ნაქირავებ ბინაში ცხოვრობდა, თუმცა მეზობლებთან კონტაქტი იშვიათად ჰქონდა.

17 წლის გოგონას სხეულზე სხვადასხვა სახის დაზიანება და ძალადობის კვალი აღენიშნება. საქმეს ხელვაჩაურის რაიონული სამმართველოს დეტექტივ გამომძიებელი არჩილ სურმანიძე იძიებს. გამოძიება 137-ე მუხლის პირველი ნაწილით მიმდინარეობს, რაც ცხრა წლამდე პატიმრობას ითვალისწინებს.

გამოძიების ინტერესებიდან გამომდინარე სატელევიზიო კომენტარისგან სამართალდამცავები თავს იკავებენ.

17 მაისს თბილისში, ლგბტ საზოგადოების წევრებისა და მათი მხარდამჭერების მიმართ გამოვლენილი ძალადობის დასაგმობად დიდ ბრიტანეთში მცხოვრებმა ქართველებმა აქცია გამართეს.

ამის შესახებ „ნეტგაზეთი“ იუწყება და აქციის ამსახველ ფოტოებსაც აქვეყნებს, რომლებიც თავად აქციის მონაწილე სტუდენტებმა გამოცემას მიაწოდა.

„ნეტგაზეთის“ ცნობით, საპროტესტო აქცია 1 საათს გაგრძელდა და მას 20-მდე ადამიანი ესწრებოდა. აქციის მონაწილეებს თან ჰქონდათ ლგბტ სიმბოლო - დროშა ცისარტყელას ფერებით, ასევე ტრანსპარანტები წარწერით: ”დაისაჯონ მოძალადე მღვდლები”.

საპროტესტო აქციის მონაწილეებმა საქართველოს საელჩოში მიმართვა დატოვეს, სადაც აღნიშნულია, რომ საქართველოს ხელისუფლებამ მაქსიმალურად მოკლე ვადაში უნდა შეძლოს მომხდარი ძალადობის გამოძიება.

ინფორმაცია და ფოტო - "ნეტგაზეთი"

"საქართველოს უახლოეს მომავალში ჩრდილოატლანტიკური საბჭო ეწვევა", - განცხადება ამის შესახებ ნატო-ს გენერალურმა მდივანმა ლუქსემბურგში ალიანსის საპარლამენტო ასამბლეაზე გააკეთა.

უცხოური მედია თბილისის ცენტრში ჰომოფობიის წინააღმდეგ დაგეგმილი აქციის დარბევას ეხმაურება.

"ეს არ იყო მემარჯვენე ექსტრემისტთა ბრბო. ესენი ჩვეულებრივი ქართველები იყვნენ: ზოგიერთი ერთობ პატივსაცემი მოხუცი ქალბატონი იყო, ასაკიანი მამაკაცები და კარგად ჩაცმული ახალგაზრდები. მათ ლიდერობას ეკლესიის მღვდლები უწევდნენ. გაშმაგებულმა ბრბომ ადვილად გაარღვია პოლიციის კორდონი და ქვები დაუშინეს იმ ავტობუსს, რომელშიც პოლიციამ ჰომოსექსუალთა უფლებების დამცველები მოათავსა", - იტყობინება "ბიბისი".

"არა მენტალურ გენოციდს", "არა ჰომოსექსუალებს" – ასეთი სლოგანებით დაუპირისპირდნენ ძირითადად ახალგაზრდებით შემდგარი ბრბო ჰომოსექსუალთა უფლებების დამცველებს, რომელთა 50-კაციან ჯგუფს ჰომოფობიის წინააღმდეგ დემონსტრაციის გამართვის სურვილი ჰქონდათ. თუმცა, ათასობით ადამიანმა მათ ქვები და კვერცხები დაუშინა. მიუხედავად დაპირებებისა, პოლიციამ ვერ შეძლო "იდენტობის" წარმომადგენელთა აქციის გამართვის უზრუნველყოფა. მომხდარი მოგვიანებით დაგმო საქართველოს პრემიერ-მინისტრმა," - წერს "ნიუ იორკ თაიმსი".

"საქართველო ერთ-ერთია იმ პოსტსაბჭოთა ქვეყნებიდან, რომელიც კანონით კრძალავს ჰომოსექსუალთა დისკრიმინაციას. თუმცა, ტრადიციულ ორთოდოქსულ ქვეყანაში ჰომოსექსუალობა ნორმიდან გადახრად ითვლება. შედეგად ჰომოსექსუალი ადამიანები ხშირად ხდებიან ძალადობისა და შეურაცხყოფის სამიზნე", - აღნიშნავს Daily Mail.

"საქართველოში ჰომოფობიის წინააღმდეგ ბრძოლის საერთაშორისო დღე დრამატულად დასრულდა. აქციის მონაწილეები მღვდლებმა და ჰომოსექსუალთა წინააღმდეგ მებრძოლმა დემონსტრანტებმა დაარბიეს. რელიგიურ და ეროვნულ სამოსში გამოწყობილი დემონსტრანტები თბილისის მთავარ მოედანზე შეიკრიბნენ და ეროვნულ სლოგანებს სკანდირებდნენ", - წერს "ევრონიუსი".

"დემონსტრაციამდე ორი დღით ადრე, საქართველოს პრემიერ-მინისტრმა განაცხადა, რომ საქართველოში სექსუალურ უმცირესობებს "იგივე უფლებებები აქვთ, რაც სოციალური ფენების სხვა წარმომადგენლებს" და რომ საზოგადოება ამას "თანდათანობით მიეჩვევა". თუმცა, თუ თბილისში 17 მაისს განვითარებული მოვლენებით ვიმსჯელებთ, ქართულ საზოგადოებას ჯერ კიდევ გრძელი გზა აქვს გასასვლელი", - წერს Foreign Policy.